Markmið þessarar viðbragðsáætlunar er að færa aðilum innan íþrótta- og æskulýðsfélaga og samtaka um allt land áætlun vegna atvika og áfalla sem geta komið upp í slíku starfi. Best er að viðbrögð allra íþrótta- og æskulýðsfélaga landsins séu eins. Í áætluninni er að finna verkferla sem skal fylgja þegar upp koma atvik eða áföll í íþrótta- og æskulýðsstarfi.
Áætlunin nær yfir alla starfsemi íþrótta- og æskulýðsfélaga á landinu, aðildarfélaga, þátttakendur, stjórnendur, fyrirtæki, starfsfólk, sjálfboðaliða og aðra ábyrgðaraðila innan félaganna. Þó að starfsemin geti verið misjöfn milli félaga, er mikilvægt að öllum líði vel við leik og störf í íþrótta- eða æskulýðsstarfi. Allt fólk á að geta gengið að því sem vísu að félagsstarf þessi bjóði upp á öruggt umhverfi og að fólk fái að vera óáreitt í félagsstarfinu óháð aldri, kynferði eða stöðu að öðru leyti. Sömuleiðis á allt fólk að geta leitað réttar sín ef atvik koma upp, án þess að óttast afleiðingar.